Posts Tagged ‘oscar’

OSCAR 2014 – கிராவிட்டி ( GRAVITY )

Posted: பிப்ரவரி 26, 2014 in ஆஸ்கார் 2014
குறிச்சொற்கள்:, , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

Gravity

ஆஸ்கரில் 10 விருதுகளுக்கு பரிந்துரைக்கப்பட்டிருக்கும் கிராவிட்டி, இதுவரை வந்திருக்கும் முப்பரிமான படங்களில் தவிர்க்கமுடியாத ஒரு படம், ஆங்கிலத்தில் டெக்னிக்கல் எக்ஸ்சலன்ஸ் என்ற சொல்லுக்கு தகுதியான இந்த வருட ஹாலிவுட்டின் ப்லாக் பஸ்டர் படம். ஏற்கனவே ஆஸ்கர் படங்களில் ஆல் இஸ் லாஸ்ட் என்ற படத்தில் ஒரே ஒரு கதாபாத்திரத்தை வைத்து எடுத்த படத்தை பற்றி பார்த்தோம், இது அந்த வரிசையில் இரண்டு கதாபாத்திரங்களை மட்டுமே வைத்து எடுக்கப்பட்டிருக்கும் படம்.

சர்வதேச விண்வெளி நிலையத்தில் தங்கியிருந்து ஆராய்ச்சி மற்றும் பராமரிப்புப் பணிகளை மேற்கொள்ளும் விண்வெளி வீரர்கள் எதிர்பாராத விதமாக விண்வெளிக் கழிவுகள் எற்படுத்தும்  விபத்தினால் அவர்களின் விண்வெளி ஓடம் பழுதடைந்துவிடுகிறது. இதன் காரணமாய் சர்வதேச விண்வெளி நிலையம் மற்றும் அருகில் பல  கிலோமீட்டர்கள் தொலைவில் உள்ள சீனாவின் சர்வதேச விண்வெளி நிலையம் உட்பட  பாழாகின்றன. புதிதாக வேலைக்கு சேர்ந்திருக்கும் படத்தின் நாயகி ரேயான் (சாந்த்ரா புல்லக்) தவிர மற்றவர்கள் அனைவரும் இறந்து விடுகின்னர். தான் வந்த விண்கலமும், பூமியைத் தொடர்பு கொள்ளத் தேவையான தொலைத்தொடர்பு சாதனங்களும் சேதமாகியிருக்க, செய்வதறியாது உயிர் வாழ வேண்டும் என்ற உந்துதலில் போராடி, ஒரு கட்டத்தில்  தற்கொலை முயற்சிக்கும் முயன்று பின்னர் கடின போராட்டத்திற்குப்பின் இறுதியில் பூமிக்குத் திரும்பி வருகிறார் கதாநாயகி

Sandra-Bulluck

இப்படத்தை சாதாரண வடிவில் அதாவது முப்பரிமான படமாக பார்க்காவிடில் வெகு சாதாரணமாகவெ தோன்றும், ஆதலால் பதிவிறக்கம் செய்து பார்ப்பவர்கள் தயவுசெய்து இப்படத்தை திரையரங்கில் சென்று பார்ப்பது நல்லது. கதையை ஒருவரியில் சாதாரணமாக சொல்லிவிடலாம். ஆனால், கதையின் கட்டமைப்பு, கலைவடிவம் தான் பிரமிப்பு. வானம் சுழல்வது போன்ற காட்சி, நம்மை நோக்கி ஓர் சிறிய கல் வருவதுபோல் தோன்ற, அருகே வரவர கல் ஒரு மனிதனாக மாறி காட்சியளிக்கிறது. இருக்கையின் நுனிக்கே வரவழைத்துவிடும் முதல்காட்சியின் பிரம்மாண்டம். இதுபோல படத்தில் பல காட்சிகள்.

சிறந்த திரைப்படம் ( Best Picture)

சிறந்த கதாநாயகி ( Best Actress in a Leading Role )

சிறந்த படப்பதிவு ( Best Cinematography )

சிறந்த இயக்கம் ( Best Direction )

சிறந்த படத்தொகுப்பு ( Best editing )

சிறந்த பாடல் (best original score )

சிறந்த கலை ( Best Production Design )

சிறந்த ஒலித்தொகுப்பு ( Best Sound Editing )

சிறந்த ஒலி சேர்ப்பு ( Best Sound Mixing )

சிறந்த விஸ்வல் எபக்ட்ஸ் ( Best Visual Effects ) என்ற 10 பிரிவுகளில் ஆஸ்கரில் பரிந்துரைக்கப்பட்டிருக்கும் கிராவிட்டி படம் விஸ்வல் எபக்ட்ஸ், கலை போன்ற பிரிவுகளில் விருதுகளை வெல்ல அதிக வாய்ப்பு இருக்கிறது. மற்றபடி சிறந்த படம், கதாநாயகி, படப்பதிவு பிரிவுகளில் கடுமையான போட்டியைக் கொடுக்கும் என்று நம்புகிறேன்.

the-croods

ஆஸ்கரில் உயிரோவிய(Animation) பிரிவில் பரிந்துரைக்கப்பட்டிருக்கும் முப்பரிமான உயிரோவிய திரைப்படமான தி க்ரூட்ஸ், புகழ்பெற்ற ட்ரீம்வொர்க்ஸ் நிறுவனத்தால் தயாரிக்கப்பட்டு 20த் சென்சுரி பாக்ஸ் நிறுவனத்தால் வெளியிடப்பட்டது.

கற்க்காலத்தில் தொடங்குகிறது கதை, ஆறு உறுப்பினர்களைக் கொண்ட ஒரு குடும்பம், குடும்பத்தலைவன் க்ரக் ஒரு பழமைவாதி, புதிய சிந்தனை என்பதே தவறு, புது சிந்தனைகள் என்பது இயல்பு வாழ்க்கைக்கு அச்சுறுத்தல் என்பது அவன் கருத்து. பிரச்சினை வரும் போதெல்லாம் குகைக்குள் சென்று நாட்கணக்கில் பதுங்கியிருப்பதுதான் அவன் வாடிக்கை. அவனுக்கு நேரெதிர் அவனது மகள் ஈப், அவள் ஒரு புதுமை விரும்பி, புது விசயங்களைத் தேடிச் செல்பவள். இதனால் இவர்கள் இருவருக்கிடையில் அடிக்கடி வாக்குவாதம் நடைபெறும், ஒரு நாள் குகைக்குள்  பதுங்கியிருக்கும்போது ஒரு ஒளி நகர்வதை பார்த்து குகைக்குள் இருந்து வெளியே வருகிறாள் ஈப். அப்போது தீயை முதன் முதலில் கண்டு ஆச்சர்யமடடைகிறாள், அதை உண்டாகிய கய் என்பவனிடம் நட்பு பரிமாறிக் கொள்கிறாள், அவன் மூலமாக அப்பகுதி நிலநடுக்கம் மற்றும் எரிமலையால் பாதிக்கப்படும் என்று அறிகிறாள். மேலும்  தன்னை தொடர்பு கொள்ள சங்கு போன்ற ஒரு இசைக் கருவியை கொடுத்துவிட்டும் செல்கிறான்  கய்

குகைக்குள் இருந்து தனியே வெளியே சென்றதற்காக க்ரக், ஈப்பை கடிந்து கொள்கிறார், தான் சந்தித்த நபர் பற்றியும், அவன் தீ செய்யத் தெரிந்தவன் என்பதையும், அவன் ஒரு புதுமைவிரும்பி என்றும் அவனைப் பற்றிய எல்லா விசயங்களையும் சொல்கிறாள், இந்நிலையில் அங்கு நிலநடுக்கம் ஏற்படுகிறது, தப்பித்தோம் பிழைத்தோம் என்று ஓடுகிறது குடும்பம், சங்கை முழங்க செய்து ஈப், கய்யை வரவழைகிறாள்.

அதன்பிறகு  கய், க்ரக் குடும்பத்தை ஆபத்திலிருந்து காப்பாற்றி, ஒரு புது இடத்திற்கு அழைத்து செல்வதே கதை. க்ரக், கய் இருவருக்குமிடையே உள்ள கருத்துவேறுபாடு நீங்கி புது முயற்சி தான் வாழ்கையை அடுத்த கட்டத்திற்கு கொண்டுபோகும் என்று க்ரக் உணர்வதாக முடிகிறது படம்.

க்ரக் கதாபாத்திரத்திற்கு நிக்கோலஸ் கேஜ் பின்னணிக் குரல் கொடுத்திருக்கிறார். நல்ல திரைக்கதையோடு, 3D படங்களுக்கே உண்டான வண்ணமயமான காட்சி அமைப்புகளோடு, நகைச்சுவையும் கலந்த ஒரு அட்வெண்சர் படமான தி க்ரூட்ஸ் ஆஸ்கரில் உயிரோவிய(Animation) பிரிவில் நல்ல போட்டியைக் கொடுக்கும், டிஸ்னியின் ப்ரோசண் படத்திற்கு வாய்ப்பு இருப்பதாக ஒரு கருத்து நிலவுவதால் க்ரூட்ஸ்கு வெற்றி கிட்டுமா என்பதை பொறுத்திருந்து தான் பார்க்கவேண்டும்.

இப்படம் வெளியாவதற்கு முன், ட்ரீம்வொர்க்ஸ் கடுமையான நிதி பற்றாக்குறையை சந்தித்துக் கொண்டிருந்தது, பல உயிரோவியக் கலைஞர்களை பனி நீக்கம் செய்யும் அளவுக்கு நிலைமை மோசமாகி போயிருந்தது, அதிர்ஷ்டவசமாக க்ரூட்ஸ்கு கிடைத்த வரவேற்ப்பில் 583 மில்லியன் டாலர் வருமானத்தை ஈட்டி ட்ரீம்வொர்க்ஸ்சின் நிதி நெருக்கடியை சமாளிக்க உதவியது, மேலும் இது சென்ற ஆண்டின் 6வது மிகப் பெரிய வசூலாக அறியப்படுகிறது.

OSCAR 2014 – நெப்ராஸ்கா ( NEBRASKA )

Posted: பிப்ரவரி 21, 2014 in ஆஸ்கார் 2014
குறிச்சொற்கள்:, , , , , , , , , , , , , , , , , , , , , , , , , , , , , , , , , , , , , , , , , , , , ,

Nebraska

6 ஆஸ்கர் பரிந்துரைகளில் உள்ள நெப்ராஸ்கா திரைப்படம், ஒரு அப்பாவும் மகனும் மேற்கொள்ளும் ஒரு பயணக்கதை (Road Trip).

மோண்டனா என்ற நகரத்தில் வசிக்கும் கிரன்ட் வுட்டி, கேட் தம்பதிகளுக்கு ரோஸ் மற்றும் டேவிட் என்ற 2 மகன்கள். கிரன்ட் வுட்டி Dementia  என்ற வியாதியால் முதிய பருவத்திற்கே உரிய மறதி, சோர்வாக இயங்குவது போன்ற கோலாறுகளால் பீடிக்கப்பட்டிருந்தார், இந்நிலையில் அவருக்கு ஒரு மில்லியன் டாலர் பரிசாக விழுந்திருக்கிறது என்று நெப்ராஸ்கா புறப்படுகிறார். ஆனால் குடும்பத்தில் உள்ள அனைவருக்கும் தெரியும் இது ஒரு புத்தக விற்பனையாளர் தனது புத்தகத்தின் ஆண்டு சந்தா விற்பனைக்கான வியாபார தந்திரத்திற்க்காக கையாளும் ஒரு வகை யுத்தியென்று. கிரன்ட் வுட்டி குடும்பத்தினர் சொல்வதை நம்ப மறுக்கிறார், ஆதலால் அவருடைய மகன் டேவிட் அவரை தனியே பயணிக்க விடுவதற்கு மனமில்லாமல் அவருடன் பயணிக்கிறான்.

நெப்ராஸ்கா போகும் வழியில் வுட்டி மற்றும் கேட்டின் சொந்த ஊரான லிங்கன் என்ற ஊரில் தங்குகின்றனர், கேட்டும் நடுவில் வந்து இனைந்து கொள்கிறார். அங்கு அவரது உறவினர்கள் மற்றும் பழைய நண்பர்களையும் சந்திக்கிறார், துரதிர்ஷ்ட வசமாக எல்லோரும் வுட்டிக்கு உண்மையில் பரிசு விழுந்து இருப்பதாக நினைத்து பரிசுத் தொகையில் அவர்களுக்கு கொஞ்சம் கொடுத்து உதுவுமாறு கேட்கின்றனர். டேவிட் உண்மையை எடுத்துக் கூறியும் யாரும் நம்பவில்லை, இதனால் சில சண்டை சச்சரவுகளையும் சந்திக்கிறான். ஒரு தருணத்தில் மற்றவர்கள் உண்மையை உணர்ந்து வுட்டியை கேலி செய்கின்றனர்.

இப்படியாக பயணத்தைத் தொடர்ந்து பரிசுத்தொகை இல்லை என்று முதியவர் வுட்டிக்கு தெரியவருகிறது, ஆனால் மில்லியன் டாலர் பணம் கிடைக்கும் அதை வைத்து ஒரு பிக்-அப் ட்ரக் மற்றும் தான் தொலைத்த ஒரு ஏர் கம்ப்ரசர் வாங்கவேண்டும் என்ற வுட்டியின் கனவு தகராமல் இருக்க வேண்டும் என்பதற்காக தன் மகிழுந்தை விற்று மகன் டேவிட் அவற்றை வாங்கி தருகிறான். வுட்டியினால் பிக்-அப் ட்ரக் ஓட்ட சட்டப்படி தகுதி இல்லாத போதும் லிங்கன் நகர்பகுதியை நெருங்கும் போது வுட்டியை ட்ரக்கை ஓட்ட செய்து அவ்வூர் மக்கள் வியந்து வுட்டியை பார்க்கும்படியாக கதை முடிகிறது.

எந்த வித படோடபமும் இல்லாமல் ஹாலிவுட் படம் போலல்லாமல் ஒரு உலக சினிமா பார்த்த திருப்தியை கொடுகிறது படம். முதியவர் ஒருவரின் வாழ்வியலை தத்ரூபமாக நம் கண்முன் கொண்டு வருகிறது படம்.

Alexander-Payne

கருப்பு வெள்ளையில் பதிவு செய்யப்பட்டிருக்கும் இப்படம் இயக்குனர் அலெக்சான்டர் பெயனுக்கு ஆஸ்கரில் 7வது பரிந்துரை, இப்பரிந்துரைகளில் தழுவி எழுதிய திரைக்கதைக்காக 2004, 2011 ஆகிய இரு முறை வெற்றி பெற்றிருக்கிறார். மேலும் நெப்ராஸ்கா திரைப்படம், இவருடைய பிறந்த ஊரான நெப்ராஸ்காவின் பின்புலத்தில் அமைந்த 4வது திரைப்படம்.

Bruce-Dern

படத்தில் முதியவராக வரும் கதாநாயகன் ப்ருஸ் டெர்னுக்கு 2வது பரிந்துரை, முதுமையின் நிஜம் அவர் முகத்தில், நடிப்பில், பாவனையில் தெள்ளத்தெளிவாக பதிவாகியிருக்கிறது. நல்ல போட்டியை இப்பிரிவில் உள்ளவர்களுக்கு இவரின் நடிப்பு கொடுத்திருக்கிறது.

சிறந்த திரைப்படம் (Best Picture)

சிறந்த நடிகர் (Best Actor in a Leading Role)

சிறந்த துணைக் கதாநாயகி (Best Actress in a Supporting Role)

சிறந்த படப்பதிவு (Best Cinematography)

சிறந்த இயக்குனர் (Best Director)

சிறந்த திரைக்கதை ( Best Writing – Original Screenplay) ஆகிய 6 பிரிவுகளில் இப்படம் ஆஸ்கர் போட்டியியில் உள்ளது.

OSCAR 2014 – பிலோமினா ( PHILOMENA )

Posted: பிப்ரவரி 19, 2014 in ஆஸ்கார் 2014
குறிச்சொற்கள்:, , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

philomena

ஆஸ்கரில் 4 பரிந்துரைகளில் உள்ள இத்திரைப்படம் மார்டின் சிக்ஸ்ஸ்மித் எழுதிய தி லாஸ்ட் சைல்ட் ஆப் பிலோமினா லீ என்ற புத்தகத்தை தழுவி பிபிசி பிலிம்சோடு இனைந்து தயாரிக்கப்பட்டது.

இங்கிலாந்தில் லேபர் கட்சியில் ஆலோசகராக இருக்கும் பத்திரிகையாளர் மார்டின் சிக்ஸ்ஸ்மித் தனது வேலையை இழந்த நிலையில், ஒரு பெண் 50 வருடங்களுக்கு முன் தனது தாய் பிலோமினாவின் குழந்தையான அந்தோனியை அவளுடைய விருப்பமில்லாமல் தத்து கொடுகப்பட்டதையும் அக்குழந்தை தற்போது எங்கிருக்கிறது என்று ஆராய்ந்து அதுபற்றி எழுதக் கோருகிறாள்.

முன்னதாக 1951ல் தாய்மையடைந்த நிலையில் பிலோமினா அயர்லாந்தில் உள்ள ஒரு ரோமன் கத்தோலிக்க காப்பகத்தில் சேர்கப்ப்பட்டு அங்கேயே மகப்பேறு அடைகிறாள். அங்கு தங்கி குழந்தைப்பெற்றதற்காக 4 வருடத்திற்கு அந்தக் காப்பகத்திலேயே தங்கியிருந்து லாண்டரி வேலைகளை செய்யுமாறு பணிக்கப்பட்டிருந்தாள். ஒரு நாளில் ஓரிரு மணிகள் மட்டுமே இவளைப் போன்றப் பெண்கள் தங்கள் குழந்தைகளுடன் இருக்க அனுமதிக்கப்பட்டனர். அக்காப்பகத்தின் குழந்தைகள் பல தாய்களின் விருப்பத்திற்க்கு மாறாக தத்து கொடுகப்படுகின்றனர். பிலோமீனாவின் குழந்தை அந்தோனியும் இப்படி தத்து கொடுக்கப்படுகிறான்.

இவ்வாறு முன்கதை இருக்க, தற்போது சிக்ஸ்ஸ்மித்தும், பிலோமீனாவும் காப்பகத்திற்க்கு சென்று குழந்தையைப் பற்றி விசாரிக்க, பிலோமீனா குழந்தை தத்து கொடுத்த விவரத்தையும் அவளின் குழந்தை பற்றிய எந்த விவரத்தையும் கேட்க மாட்டேன் என்று கையொப்பமிட்டு கொடுத்திருப்பதால் அது பற்றி விசாரிக்க வேண்டாம் என்றும் மற்றபடி பழைய கோப்புகள் யாவும் ஒரு தீ விபத்தில் அழிந்து விட்டதால் அவர்களுக்கு உதவமுடியாது என்றும் காப்பக முதன்மை அதிகாரி கூறுகிறார். ஆனால் காப்பகத்தில் உள்ள குழந்தைகள் பல அமெரிக்க வாழ் மக்களுக்கு தத்து கொடுக்கப்பட்டிருப்பது சிக்ஸ்ஸ்மித்துக்கு தெரியவர, அவரும் பிலோமீனாவும் அமெரிக்காவிற்கு பயணிக்கின்றனர். அங்கு அந்தோணி அமெரிக்க ஜனாதிபதி ரீகனுக்கும், ஜார்ஜ் புஷ்சுக்கும் ஆலோசகராக மைக்கேல் என்ற பெயரில் வாழ்ந்து இறந்து போய்விட்டதை அறிகின்றனர்.

மனம் நொந்த நிலையில் பிலோமீனா, தன் மகன் எப்போதாவது தனது தாய் மற்றும் பிறந்த மண்ணை நினைத்து பார்த்தானா என்பதை அறிய மீண்டும் மைக்கேல் என்ற அந்தோனியின் உறவினர்கள், நண்பர்களை சந்திக்கிறாள். பல தடைகளுக்குப் பிறகு பிலோமீனாவிற்கு, அந்தோனி அயர்லாந்து சென்று காப்பகத்தில் தன் தாய் பற்றி விசாரித்து அங்கு தான் ஒரு கைவிடப்பட்ட குழந்தை என்று அவர்கள் கூறியதைத் தொடர்ந்து தான் இறந்தபிறகு அந்த காப்பகத்திலேயே தன்னை புதைக்கவேண்டுமென்ற அவரது விருப்பம் நிறைவேறியதையும் அறிகிறாள்.

படத்தின் இறுதியில் சிக்ஸ்ஸ்மித்தும், பிலோமீனாவும் காப்பகத்திற்க்கு சென்று அந்தோணியின் கல்லறையில் அஞ்சலி செலுத்துகிறார்கள். முன்னதாக சிக்ஸ்ஸ்மித்திடம் இக்கதையை எழுத்து வடிவில் புத்தகமாக வெளியிட வேண்டாம் என்று சொன்ன பிலோமீனா, காப்பகத்தில் நடந்த கொடுமைகள் எல்லோருக்கும் தெரியவேண்டும் ஆதலால் புத்தகத்தை வெளியிட அனுமதிக்கிறேன் என்று கூறுவதாக கதை முடிகிறது.

கதையில் மார்டின் சிக்ஸ்ஸ்மித் கதாபாத்திரம் நாத்திகக் கருத்துகள், பருவத்தில் வரும் காமக்கிளர்ச்சி பற்றியும் பிலோமினாவுடன் பகிரும் விவாதக்காட்சிகள் ரசிக்கும்படியாக இருக்கிறது.

judi-dench

ஜேம்ஸ்பாண்ட் படங்களில் M  கதாபாத்திரத்தில் நடித்து நமக்கு பரிட்சயமான ஜூடி டெஞ்ச் இப்படத்தின் கதாநாயகியாக ஒரு தாயின் உள்ளக்குமுறல்களை வெளிக் கொணர்ந்து செம்மையாக நடித்திருக்கிறார். இவருக்கு இப்படத்தின் மூலம் ஆஸ்கர் விருது வெல்வதில் வாய்ப்பு உள்ளது, இருப்பினும் ப்ளூ ஜாஸ்மின் கதாநாயகி கேட் ப்ளான்சட், மெரில் ஸ்ட்ரிப் ஆகியவர்களுடன் கடுமையான போட்டியை சந்திப்பார்.

சிறந்த திரைப்படம் (Best Picture)

சிறந்த கதாநாயகி  (Best Actress in a Leading Role)

சிறந்த இசை (Best Original Score)

சிறந்த தழுவி எழுதப்பட்ட திரைக்கதை (Best Adapted Screenplay) என்ற 4 பிரிவுகளில் ஆஸ்கரின் பரிந்துரையில் உள்ளது.

bad-grandpa

ஆஸ்கரில் சிறந்த முக மற்றும் சிகை அலங்காரத்திற்கானப் பிரிவில், பரிந்துரையில் உள்ள இப்படத்தில்  ஜானி நாக்ஸ்வில் மோசமான 86 வயது தாத்தாவாகவும், ஜாக்சன் நிக்கல் அவருடைய 8 வயது பேரனாகவும் நடித்திருக்கின்றனர். முன்னர் வந்த ஜேக்ஆஸ் படங்களைப் பார்த்தவர்களுக்கு தெரிந்திருக்கும் இது காட்சியில் தோன்றும் ஒரு சிலரைத் தவிர மற்றவர்களுக்கு அவர்கள் அறியாமல் தத்ரூபமாக கொடுக்கப்படும் உண்மையான ரீயாக்சன்களை படப்பதிவு செய்யும் காண்டிட் கேமரா வகையான படப்பதிவு மூலம் தொகுக்கப்பட்டிருக்கும் திரைப்படமென்று.

இர்விங் என்ற 86 வயது முதியவர், தனது மனைவியின் ஈமச்சடங்கு நடைப்பெற்றுக் கொண்டிருக்கும்போது அவரது மகள் மூலம் அவரது 8 வயது பேரனுக்கு தற்காலிக காப்பாளர் ஆகிறார். இர்விங்கின் மகளின் வேண்டுகோளின்படி பேரன் பில்லியை அவனது தந்தை சக் என்பவரிடம் ஒப்படைக்க நெப்ராஸ்காவிலிருந்து நார்த் காரலினாவிற்கு அழைத்துச் செல்லும் வழியில் நடைபெறும் சம்பவங்களின் கோர்வையே பேட் க்ரான்ட்பாவின் கதை.

klnoxville

முதியவராக வரும் ஜானி நாக்ஸ்வில், பில்லியாக வரும் ஜாக்சன் நிக்கோலும் அசத்தி இருக்கிறார்கள், நீங்கள் அடல்ட் ஜோக் வகை படங்களை ரசிப்பவர்களாக இருந்தால் படம் உங்களுக்கு ரொம்ப பிடிக்கும். இல்லையெனில் தயவுசெய்து இந்தப் படத்தை தவிர்ப்பது நல்லது.

முகம் சுளிக்கும் வகையில் சில காட்சிகளில் அருவெருப்பாகவே திரைக்கதை அமைந்திருக்கிறது, முதியவர் ஸ்ட்ரிப் டான்சராக கிளப் ஒன்றில் ஆட்டம் போடுவது அருவெருப்பின் உச்சகட்டம். முதியவரின் காட்சிகளைத் தவிர்த்து சிறுவனின் காட்சியமைப்பு சிரிப்பை வரவழைக்க தவறவில்லை உதாரணத்திற்கு சிருமியாக வேடமிட்டு ஆடும் காட்சியிலும், சாலையில் போவோர் வருவோரை நீங்கள் என்னை சுவீகரித்து மகனாக ஏற்றுக் கொள்கிறீர்களா என்று கேட்கும் காட்சிகளையும் சொல்லலாம்.

இப்படத்தை ஆஸ்கரின் பரிந்துரைப்பட்டியலில் சேர்த்திருப்பது ஆஸ்கரின் கௌரவத்திற்கு பங்கம் விளைவிக்கக் கூடியது என்பது சில சினிமா விமர்சகர்களின் கருத்தாக உள்ளது. ஆனாலும் ஆஸ்கரை பொறுத்தவரையில் முக மற்றும் சிகை அலங்காரத்திற்கானப் பிரிவில் இப்படம் விருது வென்றால் ஆச்சர்யப்படுவதற்கு இல்லை, நாக்ஸ்வில்லிர்க்கு அவ்வளவு சிறப்பாக அமைந்திருக்கிறது மேக்கப். மற்றபடி  டாலஸ் பையர்ஸ் கிளப்பில் நடித்த மேத்யூ மெக்கானகேயின் மேக்கப் நாக்ஸ்வில்லின் மேக்கப்பிற்கு கடுமையான போட்டியைக் கொடுக்கும். 

ALL-IS-LOST

ஆஸ்கரின் சிறந்த ஒலிப்பதிவு(Best Sound Editing) பிரிவில், வெறும் 32 பக்க அளவிலான திரைக்கதையைக் கொண்டு படமாகப்பட்ட திரைப்படம் ஆல் இஸ் லாஸ்ட்.

படம் ஒரு பாய்மரப்படகின் மாலுமி தனது வாழ்நாளின் இறுதியில் இருப்பதாக என்னி, நான் எவ்வளவோ முயன்றேன் எல்லாம் போய்விட்டது என்று தன் கதையை கூறுவது போல ஆரம்பிக்கிறது. 8 நாட்களுக்கு முன் தொடங்கும் பிளாஷ் பேக்கில், இந்தியப் பெருங்கடலின் சுமத்ராவிலிருந்து 1700 நாட்டிகல் மைல் தொலைவில் கதையின் ஒரே கதாபாத்திரமான நமது பாய்மரப்படகின் மாலுமி, படகின் உள்ளே தண்ணீர் புகுந்த நிலையில் தன் தூக்கத்தில் இருந்து எழுந்திருகிறார். ஏதோ ஒரு கப்பலில் இருந்து விழுந்த ஒரு கொள்கலனின்(container) கூரான ஒரு முனை படகின் பக்கவாட்டில் குத்தி படகை சேதப்படுத்தி இருப்பதை அறிகிறார். தண்ணீர் உள்ளே நுழைந்ததால் தொலைத்தொடர்பு கருவிகள் பழுதுபட்ட நிலையில் படகின் சேதப்படுத்தப்பட்ட இடத்தை அடைத்து தன் பயனத்தைத் தொடர்கிறார் மாலுமி. சில மணிநேர இடைவெளியில் ஒரு பெரும்புயலில் சிக்குகிறார், கொட்டித் தீர்க்கும் மழையில் படகு முழுமையாக பழுதடைந்து மூழ்குகிறது.

மூழ்கும் பாய்மரபடகில் இருந்த அவசரகால உபயோகித்திற்கான  ரப்பர் படகில் ஏரித் தப்பிக்கிறார். மீண்டும் மழை, வெப்பம், சுறா மீன்கள், பசி என்று பலப் பிரச்சினைகளில் இருந்து தன் உயிரைக் கையில் பிடித்துக் கொண்டு கடலின் நீரோட்டப் போக்கில் பயணிக்கிறார். இடையில் 2 சரக்குக் கப்பல்கள் இவரது கூக்குரலையும், சைகைகளையும் அறியாமல் ரப்பர் படகைத் தாண்டி போகிறது. படத்தின் இறுதியில் மாலுமிக்கு சுமத்ரா கடல் எல்லைக்குள் ஒரு சிறிய மீன்பிடி படகு கண்ணுக்கு தென்படுகிறது, சைகை செய்ய எந்த உபகரணம் இல்லாத காரணத்தினால் தன்னிடம் உள்ள சில காகிதங்களை எரித்து செய்கை செய்கிறார் மாலுமி, தீ பரவி ரப்பர் படகு முழுதும் எரிந்து பாழாகிறது, உயிரை காப்பாற்றிக்கொள்ள கடலில் விழுகுகிறார். உடலின் சக்தி யாவும் இழந்துவிட்ட நிலையில் நீச்சலிடக்கூட தெம்பு இல்லாத நிலையில் ஏறக்குறைய மூழ்கி இறந்து கொண்டிருக்கும் நிலையில் மீன்பிடி படகு, மாலுமியை நெருங்கி அவரைக் காப்பாற்ற அதிலிருந்து ஒருவர் கை கொடுத்து தூக்க முற்படுவதாக கதை முடிகிறது.

ROBERT-REDFORD

லைப் ஆப் பை, டைட்டானிக் போன்ற பல படங்களை கடல்வெளியில் உயிரைக் காப்பாற்றிக்கொள்ள  போராடும் வகையில் நாம் பார்த்திருந்தாலும் ஆல் இஸ் லாஸ்ட் திரைப்படம் அதிலெல்லாம் இருந்து வேறுபட்டே காணப்படுகிறது. கதாநாயகன் ராபர்ட் ரெட்போர்ட்டின் நடிப்பு படத்திற்கு அழகு சேர்த்து இருக்கிறது. முயற்சி, விடாமுயற்சி, தன்னம்பிகை, சமயோஜித புத்தி, இப்படி பல விசயங்களைப் பற்றிய திரைப்படம் இது . ஒரே ஒரு கதாபாத்திரம் மட்டுமே இடம்பெற்ற திரைப்படம் இதற்கு முன் எங்காவது வெளியாகி இருகிறதா என்பது தெரியவில்லை, இருக்காது என்பது எனது அபிப்ராயம். முன்னமே கூறியது போல இப்படம் 32 பக்க அளவிலான திரைக்கதை, படத்தின் வசனங்கள் அதில் 2 பக்கம் கூட இருக்காது என்று நினைக்கிறன்.

இப்படம் க்ராவிட்டி, கேப்டன் பிலிப்ஸ் போன்ற பெரிய படங்களுடன் ஒளிப்பதிவுக்கான(Best Sound Editing) பிரிவில் ஆஸ்கரில் போட்டியில் உள்ளது. விருது கிடைக்குமா என்பதை பொறுத்திருந்துதான் பார்க்கவேண்டும்.

BlueJasmine

மூன்று பிரிவுகளில் ஆஸ்கார் விருதுகளுக்கு பரிந்துரை செய்யப்பட்டிருக்கும் ப்ளூ ஜாஸ்மின் ஹாலிவுட்டின் ஜாம்பவான்களில் ஒருவரான உட்டி ஆலனால் எழுதி இயக்கப்பட்டது. இப்படம், பணக்கார உயர் குடியில் வாழ்ந்து வறுமையின் பிடியில் தள்ளப்பட்டு இருக்க இருப்பிடம் கூட இல்லாத நிலையில் தனது சகோதரியின் தயவில் வாழும் நிலைக்கு உள்ளான ஒரு பெண்மணியின் கதை. விரக்தியடைந்து ஒரு வித மனச் சிதைவுக்கு ஆளான ஜாஸ்மின் பாத்திரத்தில் கேட் ப்லேங்கட்  (Cate Blanchett) அசத்தி இருக்கிறார். உயர்குடியில் வாழும் நிலையில் பணக்கார செருக்குடன் அவர் தனது சகோதரியையும் அவரது கணவரையும் உதாசீனப்படுத்தி வரும் காட்சிகளிலும், வறுமையில் அதே சகோதரியின் தயவை நம்பி வரும் காட்சிகளிலும் தனது இயலாமையினை என்னி வருந்தும் காட்சிகளிலும், தனக்கு தானே பேசிக் கொள்ளும் மனச் சிதைவடைந்த நிலையில் இருக்கும் காட்சிகளிலும் அவருடைய இயல்பான நடிப்பு படத்திற்கு பெரும்பலம் கூட்டுகிறது. கேட் ப்லேங்கட்டின் தங்கையாக வரும் சேலி ஹாக்கின்ஸ் தன் வாழ்கை திசை மாற காரணமாக இருந்தது தன் சகோதரி தான் என்றாலும் அவள் பால் கொண்ட அன்பினால், அவளை அரவணைக்கும் காட்சிகளிலும், சகோதரி செல்வச் செருக்கினால் தன்னை உதாசீனப்படுத்துவது கூட அறியாத அப்பாவியாக வரும் காட்சிகளிலும் அவரின் நடிப்பு அருமை. கதாநாயகியை மையப்படுத்தியே கதை நகர்ந்தாலும் கதையின் போக்கை நாம் முன்கூட்டியே உணர முடிந்தாலும் ஜாஸ்மின் கதாபாத்திரத்தின் நேர்த்தி படத்திற்கு வெற்றி

woody-allen

இப் படத்தில் சிறந்த திரைக்கதைக்கான (Best Original Screenplay)  பிரிவில் பரிந்துரைக்கப்பட்டிருக்கும் உட்டி அலன் ( Woody Allen) நான்கு முறை ஆஸ்கார் விருது வாங்கியவர், அதில் மூன்று முறை சிறந்த திரைக்கதை (Best Original Screenplay)  பிரிவிலும், ஒருமுறை சிறந்த இயக்குனருக்கான விருதையும் பெற்றிருக்கிறார். இவர் 16  முறை திரைக்கதைக்காகவும் 7 முறை இயக்குனருக்காகவும் 1 முறை நடிகருக்காகவும் ஆக இதுவரை 24  முறை ஆஸ்கரின் விருதுப் பரிந்துறையில்  இடம் பெற்றவர். இதில் திரைக்கதைக்கான பிரிவில் 16  முறை பரிந்துரை செய்யப்பட்டிருப்பது ஒரு சாதனை. 7 முறை இயக்குனருக்காக, இதுவரை 3 பேர் பரிந்துறைக்கப்பட்டிருக்கிறார்கள் அதில் இவரும் ஒருவர். 76 வயதில் இவர் மிட்நைட் இன் பாரிஸ் என்ற படத்திற்காக 2011ல் வாங்கிய திரைக்கதைக்கான விருது அதிக வயதில் இப்பிரிவில் விருது வாங்கியவர் என்ற பெருமையை இவருக்கு கொடுத்திருக்கிறது.

Film Cate Blanchett

2004ல் ஏவியேட்டர் படத்தின் மூலம் சிறந்த துணை நடிகைக்கான (Best Supporting Actress) பிரிவில் விருது பெற்ற கேட் ப்லேங்கட் இந்த படத்தில் சிறந்த நடிகைக்கான பரிந்துறையில் உள்ளார். கோல்டன் க்லோப் விருதில் ஏற்கனவே இப்படத்தின் மூலம்  சிறந்த நடிகைக்காண விருதை தட்டி சென்ற இவருக்கு  ஆகஸ்ட்: ஆரஞ்சு கவுன்டி படத்தில் நடித்த மெரில் ஸ்ட்ரிப்  கடுமையான போட்டியைக் கொடுப்பார் என்பதில் ஐயமில்லை.

sally hawkins

முதல் முறையாக சிறந்த துணை நடிகைக்கான பிரிவில் பரிந்துரைக்கப்பட்டிருகிறார் படத்தில் கேட் ப்லேங்கட்டுக்கு தங்கையாக வரும் சேலி ஹாக்கின்ஸ் (Sally Hawkins). 12 ஈயர்ஸ் ஆப் ஸ்லேவ் படத்தில் நடித்த லூபிடா மற்றும் ஆகஸ்ட்: ஆரஞ்சு கவுன்டி படத்தில் நடித்த ஜூலியா ராபர்ட்சும் இவருக்கு கடுமையான போட்டியைக் கொடுப்பார்கள் அதையும் மீறி இவருக்கு இவ்விருது கிடைக்குமா ?என்பதை பொறுத்திருந்து தான் பார்க்க வேண்டும்.

டைட்டானிக் கதாநாயகி என்றவுடன் கேட்வின்சலேட்  என்று நினைத்துக்கொள்ளதீர்கள், கேட் வின்சலேட்டின்  வயதான கதாபாத்திரத்தில் நடித்த  குலோரியா ஸ்டீவர்ட் தான் உயிர் நீத்தவர். டைட்டானிக் நம் வாழ்நாளில் பார்த்த மிக சிறந்த படங்களில் ஒன்று, கதையை ஒரு பாட்டியின் கண்ணோட்டத்தில் இருந்து சொல்வார்கள். அந்த பழம் பெரும் நடிகை குலோரியா ஸ்டீவர்ட், தனது நூறாவது வயதில் கடந்த ஞாயிறு காலமானார். 20 வருடங்களுக்கு முன்பே அவருக்கு மார்பக புற்றுநோய் இருந்தது கண்டுபிடிக்கப்பட்டு சிகிச்சை எடுத்து வந்திருந்தார், மூப்பின் காரணமாக 5 வருடங்களுக்கு முன்பு  நுரையீரலில் புற்றுநோய் உண்டானது மரணத்தை தள்ளிப் போட்டுக்கொண்டே வந்த இவர் ஞாயிறன்று இறந்தார், ஹாலிவுட் வட்டாரங்கள் அவரின் மறைவுக்கு ஆழ்ந்த இரங்கலை தெரிவித்த வண்ணம் உள்ளனர். அதிக வயது ஆனபின்பு ஆஸ்கர் விருதுக்கு பரிந்துரைக்கப்பட்டவர்(nominee) என்ற புகழுக்கு சொந்தக்காரர். 1940 களிலேயே தன்னுடைய நடிப்புக்கு முழுக்குபோட்ட அவர்  1970க்கு பின்பு  தொலைக்காட்சிகளிலும், சில படங்களிலும்  நடிக்க ஆரம்பித்தார்.

டைட்டானிக் புகழுக்கு பிறகு அவர் எழுதிய சுயசரிதை எல்லோரின் புருவங்களையும் உயர்த்துவதாக அமைந்தது, காரணம் அவரின் அந்தரங்கங்களை வெளிப்படையாக எழுதியதே, முக்கியமாக செக்ஸ் சம்பந்தப்பட்ட அவருடைய மறுமுகம்.

அவர் நடித்த சில புகழ்பெற்ற படங்கள்

The Invisible Man”

“Gold Diggers of 1935”

“Poor Little Rich Girl”

“Rebecca of Sunnybrook Farm”

 துணுக்கு செய்தி: ஒரு படத்தில் ஒரே கதாபாத்திரத்தில் நடித்த 2 பேருக்கு ஆஸ்கார் விருது பரிந்துரைக்கப்பட்டது(nomination) ஆஸ்கார் வரலாற்றிலேயே டைட்டானிக்  ரோஸ் கதாபாத்திரத்திற்கு  மட்டும் தான், ஆனால் இருவருக்குமே விருது கிடைக்கவில்லை.

அமீர் கானின் பீப்ளி லைவ் இந்த வருட ஆஸ்கார் விருதுக்கு இந்தியா சார்பில் பரிந்துரைக்கப்பட்டிருகிறது.   இது அமீர்கானின் மூன்றாவது முயற்சி, ஏற்கனவே அவரின் லகான், தாரே ஜமீன் பர் என்ற இரண்டு படங்கள் இந்தியா சார்பில்  பரிந்துரைக்கப்பட்டிருக்கிறது. இந்தப்படம் அமீர்கானால் தயாரிக்கப்பட்டு UTV சார்பில் வெளியிடப்பட்டிருக்கிறது. இந்த முறை 5 தமிழ்த் திரைப்படங்கள் போட்டியில் இருந்தன, அவை சிங்கம், மதராசப் பட்டினம், ராவணன், விண்ணைத்தாண்டி வருவாயா, அங்காடித்தெரு. இதில் அங்காடித்தெரு பீப்ளி லைவ்க்கு கடுமையான போட்டியை கொடுத்திருக்கிறது என்பதில் பெருமிதம் தான்.  இந்திய விவசாயிகளின் ஏழ்மையையும், அதன் கொடூரத்தினால் ஏற்படும் இன்னல்களையும் விளக்குவதாகவும், இந்திய கலாச்சாரத்தை எடுத்தியம்புவதாகவும் உள்ளதால் அங்காடித்தெருவை தாண்டி ஒரு அடி முன்னெடுத்து வைத்து ஆஸ்காருக்கான இந்தியப்  பரிந்துரையில் இடம் பிடித்திருக்கிறது பீப்ளி லைவ். மேலும் பா, ராஜ்நீதி, மை நேம் இஸ் கான் முதலான 27 திரைப்படங்களை ஓரங்கட்டி  இருக்கிறது இந்தப் படம். 15 பேர் கொண்ட FILM FEDERATION OF INDIA  குழு இந்த பரிந்துரையை வெளியிட்டு இருக்கிறது.

அங்காடித்தெரு உண்மையில் நல்லதொரு திரைப்படம், பீப்ளி லைவ் படத்தை நான் இன்னும் பார்க்கவில்லை, அதனால் ஒப்பிட்டு கருத்து சொல்ல முடியவில்லை. இருப்பினும் பீப்ளி லைவ் படத்தின் காட்சிகளை தொலைகாட்சியின் வாயிலாகவும் சில வலைதளங்களிலும் பார்த்தேன்.  படம் நன்றாக இருக்கும் என்றே நம்புகிறேன்,  நம் வசந்தபாலனுக்கு போட்டி கொடுத்த படம் என்ற வகையில் ஒப்பிட்டு பார்க்கவாயினும் படத்தை பார்க்க வேண்டும்.

சரி அதெல்லாம் போகட்டும், இந்த பரிந்துரையில் 27 படங்கள் போட்டியில் இருந்தன என்பதை ஏற்கனவே சொல்லி இருந்தேன். மதராசப்பட்டினத்தை விடுங்கள் அது ஓரளவிற்கு ஒரு திரைப்பட விழாவில் இடம் பெறத்தக்கவகையில் உள்ள படமே, சிங்கம், இராவணன், விண்ணைத் தாண்டி வருவாயா இதெல்லாம் எப்படி இந்த 27 க்குள் அடங்கியது என்பது தான் புரியாதபுதிர். சிறந்த அந்நிய மொழிப்படம், அதாவது ஆங்கிலமல்லாத சிறந்த திரைப்படம். ஆங்கிலம் பேசுபவர்களுக்கு உலக சினிமா என்ற வட்டத்திற்குள் வரும் படம். நாமும் நிறைய நியோரியலிசம் படங்களை இந்த வகையின் கீழ் பார்த்திருக்கிறோம், இந்தப் படங்களை அந்த வகையின் கீழ் கொண்டு வரமுடியுமா?

இந்தியாவைப் பொருத்தமட்டில் கடந்த வருடம் 24 மொழிகளில் 1288 திரைப்படங்கள் வெளியாகி இருக்கின்றன, அல்லது தணிக்கை செய்யப்பட்டு இருக்கின்றன. இதிலிருந்து 1 படம் மட்டும் எப்படி இந்தியா சார்பில் போகமுடியும். ஏன் மொழிகளின் அடிப்படையில் பரிந்துரைகள் இருக்கக் கூடாது ஏனெனில் இது சிறந்த அந்நிய மொழித்திரைப்படம் தானே தவிர, சிறந்த அந்நிய நாட்டு படம் என்ற வகை இல்லையே, இருந்திருந்தால் அங்காடித் தெருவையும் சேர்த்து 24 படங்களை அனுப்பி இருக்கலாமே. சரி அதுவும் வேண்டாம் அதிக அளவில் சிறந்த படங்களை எடுக்கும் ஹிந்தி, தெலுங்கு, தமிழ்,மலையாளம், கன்னடம், மராத்தி, பெங்காலி, போன்ற குறிப்பிட்ட மொழிகளில் இருந்தாவது தனித் தனியாக அனுப்பலாமே, இதில் என்ன நடைமுறை சிக்கல் இருக்கிறது என்பது எனக்கு தெரியாது.  எல்லா போட்டிகளுக்கும் ஒரு வரைமுறை இருக்கும், கண்டிப்பாக ஆஸ்காருக்கும் அதே வகையில் சில கட்டுபாடுகளும் விதிகளும் இருக்கலாம், ஆனால் சினிமா ஆர்வலர்கள் மொழிகளை அடிப்படையாக வைத்து இந்த பரிந்துரை அமைய ஏதேனும் ஒரு சிறிய அளவில் முயற்சி எடுத்தால் நன்றாக இருக்கும் என்ற எனது அவாவை உங்களோடு பகிர்ந்துகொள்கிறேன்.

 நன்றி: http://filmfed.org/IFF2009.html

இளவரசர் ஜூதா பென்-ஹார் ஜெருசலத்தில் ஒரு பெரும் வியாபாரி. அவனுடைய பால்ய  நண்பன் மெசல்லா, ஒரு ரோமன், கதை ஆரம்பிக்கும்போது அவன் தனது போர் பயிற்சிகளை எல்லாம் முடித்து  ஒரு படைதளபதியாக தலைநகருக்கு வருகிறான். அவன் தனது ரோமன் என்கின்ற பிறப்பால் இறுமாப்பு கொண்டு பேசலானான் இது ஜூதாவை புண்படுத்துவதாக அமைந்தது காரணம் ஜூதா ஒரு யூதன். ஜூதாவின் வீட்டில் ஒரு அடிமை குடும்பம் இருந்தது. அதில் எஸ்தர் என்ற பணிப்பெண்ணும்  அடக்கம். எஸ்தருக்கு ஜூதாவிற்கும் இடையில் ஒரு ஈர்ப்பு இருந்தது, ஆனால் எஸ்தருக்கு திருமணம் நிச்சயமானது அதன் பொருட்டு அவளுக்கு திருமண பரிசாக அடிமை நிலையில் இருந்து விடுதலை வழங்கினர் ஜூதா. 

இதனிடையில் ஒரு நாள் அந்த பிராந்தியத்துக்கு புது ஆளுனர் நியமிக்கப்பட்டதை ஒட்டி ஒரு சிறிய பேரணி நடந்தது அது ஜூதா வீட்டுக்கு நேரே வரும்போது எதேச்சையாக மாடியின் நின்று பார்த்துகொண்டிருந்த ஜூதா மற்றும் அவரது தங்கை திர்சா மாடியின் கைப்பிடி சுவரை பிடிக்க அது உடைந்து ஆளுனர் தலை மீது சில செங்கற்கள் விழ ரோம வீரர்கள் ஜூதா, அவரது தங்கை திர்சா அவரது தாய் மரியம் ஆகியோரை கைது செய்தார்கள். இந்த நிகழ்ச்சியை காரணம் காட்டி ஜூதா சிரியிலடைக்கப்பட்டு விசரனைகுட்படுத்தப்பட்டான், விசாரணையில்  ஜூதா இந்த நிகழ்ச்சி தற்செயலாக நடந்தது என கூறி வாதிடும் பயனில்லாமல் போனது அவரை ஆயுள்கைதியாக்கி போர் கப்பல்களில், கப்பலை செலுத்தும் அடிமையாக பணித்தனர். 

3 வருடத்துக்கு பிறகு,   அர்ரியஸ் என்பவனின் போர் கப்பலில் பனி புரிந்து கொண்டிருந்தான் ஜூதா, அந்த சமயத்தில் நடந்த ஒரு பெரும் தாக்குதலின் போது ஜூதாவின் திறமையால் அந்த தாக்குதலை இலகுவாக சமாளிக்க  முடிந்தது. இதனால் சந்தோசபட்ட  அர்ரியஸ் தனது செல்வாக்கினால் ஜூலியஸ் சீசர்(மன்னர்), ஜூதாவின் குற்றங்கள் யாவற்றையும் மணிக்குமாறு செய்து அவருக்கு விடுதலை வாங்கி கொடுத்தார். மேலும் ஜூதாவை தனது புதல்வனாக சுவிகாரம் எடுத்துக்கொண்டார். மீட்டு எடுக்கப்பட்ட தனது சுதந்திரத்துடன், செல்வங்களுடனும் ரோமானிய வழிமுறைகளில் ரதம் செலுத்தும் முறையிலும் நல்ல தேர்ச்சி பெற்றார். இந்நிலையில் தனது குடும்பத்தை நினைத்து ஏங்கினார்.  

தனது சொந்தங்களை தேடி வரும் வழியில் ஒரு அரபியனை சந்திக்க நேர்ந்தது அங்கு ஜூதாவின் தேரோடும் வன்மையை பார்த்து அந்த அரபியன் சில நாட்களுக்குள்  நடக்க இருக்கும் பந்தயத்தில் தனது சார்பாக களது கொளுமாறு வேண்டினான் ஆரம்பத்தில் மறுத்துரைத்த ஜூதா, மெசல்லா அந்த பந்தயத்தில் கலந்து கொள்வதை கேள்வி பட்டு தானும் கலந்து கொள்வதாக கூறினான். இதற்கிடையில் அங்கே  ஜூதாவிற்கு திருமணம் நடந்தேறுகிறது. 

ஜூதா, எஸ்தரின் திருமணம் நின்றுவிடதையும், அவள் இன்னும் தன்னை  காதலித்து கொண்டு இருப்பதையும் அறிந்தான்.  தனது தாய் மரியம் மற்றும் தங்கை திர்சாவை சிறையில் இருந்து விடுவிக்குமாறு  மெசல்லாவை வேண்டினான், ரோமானியர்கள் அவர்களுக்கு தொழு நோய் இருப்பதை கண்டறிந்து அப்பொழுதே அவர்களை நகரத்தை விட்டு வெளியேற செய்தனர்.  எஸ்தருக்கு விஷயம் தெரிய வர அதை ஜூதாவிற்கு தெரிவிக்க வேண்டாம் என கூற. எஸ்தர் ஜூதாவின் தாய் மற்றும் தங்கை இறந்து விட்டதாக ஜூதாவிடம் கூற நேர்ந்தது. 

மிகுந்த வன்மத்தோடு பந்தயத்தில் களமிறங்குகிறார் ஜூதா, மெசல்லா சூழ்ச்சியான முறையில் தேரை செலுத்தி ஜூதாவை தோற்கடிக்க போராடி தோற்று இறந்தும் போகிறான். போட்டியில் வெற்றி பெற்ற ஜூதாவை மெசல்லா இறக்கும் தருவாயில் அவனது தாய் தங்கை நகரத்துக்கு வெளியில் இருக்கும் ஒதுக்குபுறமான ஒரு இடத்தில தொழு நோயோடு போராடி கொண்டிருப்பதாக  சொல்லிவிட்டு இறந்து விடுகிறான். 

வன்மத்தோடு இருக்கும் ஜூதா,  மெசல்லாவின் மேலுள்ள கோபம்  நீங்கியவனாக தனது தாய் தங்கையை சந்திக்க நகரத்துக்கு வெளியில் உள்ள ஒரு மலைக்குகைக்கு செல்கிறார். அவரது தாயார் ஜூதாவை சந்திக்க மறுக்கிறார், ஆனால் ஜூதா அவர்களின் மறுப்புரைகளை மீறி  சந்திக்கிறார்,  இந்த தருணத்தில் இயேசு கிருஸ்து உயிர்த்தெழுகிறார். உலக மக்களின் பாவங்களை போக்கும் பொருட்டு தனது இன்னுயிரை ஈந்ததால் அந்த தருணத்தில் ஜூதாவின் தாய் தங்கையின் பினி போங்குகிறது, கதை இனிதாய் முடிகிறது.

லேவ் வாலஷ் என்பவர் 1880 ல் எழுதிய பென்-ஹார்: எ டேல் ஆப் தி  கிரைஸ்ட்  என்ற நாவல் வில்லியம் வயளீர் அவர்களால் 1959ல் இயக்கி வெளியிடப்பட்டது.
 
பென்-ஹார் பெரும் பொருட்செலவில் MGM நிறுவனம் தயாரித்து வெளியிட்டது, ஏறக்குறைய  90 மில்லியன் டாலர் வசூல் சாதனை செய்தது. ஏறத்தாழ 300 அரங்கங்கள் இந்த திரைப்படத்துக்காக பயன் படுத்தப்பட்டன, 340 ஏக்கர் நிலப்பரப்பும் தேவைப்பட்டதாக தகவல்.
 
கப்பல் அரங்கம் மற்றும் தேர் பந்தயம் நடத்தும் விளையாட்டு அரங்கம் இன்றளவும்  சினிமா ரசிகர்களால்
பாராட்டப்படுகிறது. தேர் பந்தயத்தின்போது கேமரா கோணங்களும் ஆக்சன் காட்சிகளும் அற்புதமாக படமாக்கப்பட்டுள்ளது. 3 மாதம் மற்றும் 15000 துனை நடிகர்கள் சகிதமாக 18 ஏக்கர் நிலப்பரப்பில் படமாக்கபட்டது. 18 தேர் வடிவமைக்கப்பட்டது அதில் பாதிக்கு மேல் ஒத்திகைக்காகவே  பயன்படுத்தப்பட்டது. இந்தப் படம் 11 ஆஸ்கர் விருதுகளை வென்றது, இந்த சாதனையை  பல ஆண்டுகளுக்கு பிறகு டைட்டனிக் திரைப்படம் சமன் செய்தது.